Раководителите на деловните субјекти ја оценуваат економската состојба во јануари како понеповолна во споредба со претходниот месец, а малку понеповолна е и оценката за обезбеденоста на производство со порачки, покажуваат податоците на Државниот завод за статистика.

Обемот на производство на деловните субјекти во јануари бележи раст во споредба со претходните три месеци, а очекувањата за него во наредните три месеци се оптимистички. Неповолни се очекувањата за бројот на вработените.

Залихите на суровини и репроматеријали, како и набавките на суровини и репроматеријали се под нормалата. Намалени се залихите на готови производи во споредба со претходниот месец.

Според оценката на раководителите, во наредниот период просечните набавни цени на инпутите ќе се зголемат, а продажните цени на готовите производи ќе се намалат.

Просечното искористување на капацитетите на претпријатијата во јануари во однос на претходниот месец е намалено и изнесува 51,4 отсто од нормалното искористување. Најголемо влијание на ограничувањето на обемот на производството во јануари имаат недоволната странска побарувачка со 26,8 отсто, недоволната домашна побарувачка со 19,4 отсто, финансиските проблеми со 11,6 проценти и неизвесното економско опкружување со 10,5 отсто.

Напишано од Ф.М.